Алынды: 10.04.2026
Қабылданды: 12.05.2026
Онлайн жарияланды: 30.06.2026
ӘОЖ: 616.314.17-008.1:616.71-007.234:616.314-089.843
DOI: 10.70113/1815-9443.2026.72.53.001
ТІС ИМПЛАНТАЦИЯСЫН ЖОСПАРЛАУ БАРЫСЫНДА ЖҮЙЕЛІ ОСТЕОПОРОЗДЫҢ ПАРОДОНТ ТІНДЕРІНІҢ ЖАҒДАЙЫ МЕН ЖАҚ СҮЙЕКТЕРІНІҢ СҮЙЕК ТІНІ САПАСЫНА ӘСЕРІ
Дильбарханов Б.П.1*, Мусаев Б.С.2, Рузуддинов Т.Б.3
1 «Астана медицина университеті» КеАҚ, Қазақстан, Астана
2 «Қазақстан-Ресей медициналық университеті» МЕББМ, Қазақстан, Алматы
3 С.Д. Асфендияров атындағы Қазақ ұлттық медицина университеті КеАҚ, Қазақстан, Алматы
*Хат-хабарға жауапты автор
Өзектілігі. Егде жастағы адамдар арасында остеопороздың таралу жиілігінің артуы дентальды имплантаттарды қолдана отырып ортопедиялық стоматологиялық оңалтуды қажет ететін пациенттер санының көбеюімен қатар жүруде. Сүйек тінінің минералдық тығыздығының өзгеруі остеоинтеграция үдерістеріне және имплантологиялық емдеудің ұзақ мерзімді нәтижелеріне әсер етуі мүмкін.
Зерттеудің мақсаты. Дентальды имплантацияны жоспарлау кезеңінде жүйелі остеопорозы бар пациенттердегі пародонт тіндерінің жағдайын және жақ сүйектерінің сүйек тінінің сапасын бағалау.
Материалдар мен әдістер. Жасы 50–68 жас аралығындағы 60 пациентке кешенді тексеру жүргізілді. І топқа постменопаузалық остеопорозы бар 15 әйел, ІІ топқа сенильді остеопорозы бар 22 пациент, ІІІ топқа сүйек тінінің жүйелі патологиясы жоқ 23 пациент енгізілді. Клиникалық тексеру, стоматологиялық статусты индекстік бағалау, конустық-сәулелі компьютерлік томография, ультрадыбыстық денситометрия және зертханалық диагностика жүргізілді.
Нәтижелері. Остеопорозы бар пациенттерде пародонт тіндерінің жағдайының статистикалық тұрғыдан сенімді нашарлауы, тісжегінің қарқындылығының артуы және жақ сүйектері сүйек тінінің тығыздығының төмендеуі анықталды. 300 HU-ден төмен сүйек тіні тығыздығы постменопаузалық остеопорозы бар әйелдердегі өлшеу аймақтарының 93,1%-ында және сенильді остеопорозы бар пациенттердегі өлшеу аймақтарының 52,8%-ында тіркелді. Алынған нәтижелер дентальды имплантация жүргізер алдында осы санаттағы пациенттерді жан-жақты тексерудің қажеттілігін көрсетеді.
Қорытынды. Жүйелі остеопорозы бар пациенттерде пародонт тіндерінің жағдайы мен жақ сүйектерінің сүйек тіні сапасының айқынырақ өзгерістері анықталды. Имплантологиялық емдеуді жоспарлау клиникалық және рентгенологиялық көрсеткіштерді кешенді бағалауға негізделуі тиіс.
Түйінді сөздер: остеопороз, дентальды имплантация, пародонт, сүйек тіні, денситометрия, конустық-сәулелі компьютерлік томография (КЛКТ).
